10 خطوات للقضاء على الكسل والمماطلة.. روشتة مجانية

حد كان لسه منزل بوست بيسأل عن علاج الكسل والتسويف

طيب دول كم نقطة كده كتبتهم دلوقت بما إني فاضي ممكن يساعدوا، لكن أهم نقطتين فعلا عملتهم وفرقوا معايا هخليهم في الآخر،
وأرجوك بلاش ألاقيك نازل ع آخر نقطتين ع طول زي ما هتعمل دلوقت، بلاش كسل من أولها خلي ربنا يكرمك

1- ابدأ بلماذا

اتكلمت عن النقطة دي في بوست لوحده ودا اللينك
ابدأ بـ "لماذا"

وهتكلم عنها تاني لإنها فعلا مهمة، هي نقطة البداية

اعرف إنت عايش ليه وإيه هدفك في الحياة ومتقوليش مش لاقي هدف، اتشقلب اخترعلك هدف لإن بدون ما يكون عندك هدف ودافع عايش علشان توصله يبقى متزعلش مني ملكش لازمة

"إن لم تزد على الحياة شيئا تكن أنت زائدا عليها"

2- زُق عقلك بنفسك

بمعنى متستناش من حد يقولك "هايل، كمٌل، تقدر تطير..."

إنت أولى بنفسك وإنت اللي بتملك زمام الأمور، طالما حققت النقطة الأولى وحطيت لنفسك هدف، يبقى من هنا ورايح كل ما تلاقي نفسك ملّيت أو زهقت حط هدفك قصاد عينك

3- الفدية

كل حاجة وليها تمن، عايز تبقى ناجح في حياتك ومش عايز تبقى فاشل ؟
تمام يبقى لازم تكون مستعد تماما إنك تدفع تمن النجاح، التمن ده مش حاجة معينة، ممكن يكون:

صحيانك بدري، عدد ساعات نوم أقل من المعتاد، إنك تستحمل أي ضغط وأي صعوبات تواجهك حتى لو مش قادر

المهم تكون عارف إنه هيكون تمن غالي وصعب، فلازم تسأل نفسك هتقدر ولا لأ، ولازم الإجابة تكون أيوة هقدر

4- ريفريش

يعني تعالى بص ليومك كده وشوف بتعمل فيه إيه من اول ما بتصحى لحد ما تيجي تنام، سيبني أنا أقولك:

بتفضل نايم لحد الظهر غالبا، بتقوم أول حاجة بتعملها تفتح الفيس وتقول لنفسك هشوف بس النوتفيكيشن وأقوم أغسل وشي، فجأة تلاقي نفسك قعدت حوالي نص ساعة أو ساعة

تقوم تصلي(لو كنت بتصلي) وجيس وات تعمل إيه بعد كدا، تمسك الموبايل تاني تشوف الفيس اللي إنت لسه شايفه من شوية وعارف إن مفيش جديد حصل، زهقت؟ تقوم لاعب جيم ببج، بص العصفورة، المغرب أذّن !

الفكرة إنك فعلا لو جيت تبص على يومك وتفرزه كده هتتحسر على عدد الساعات اللي بتضيع منك كده في الهوا، طيب دا ينفع ؟

اعمل جرد لليوم بتاعك واحذف أو قلل أي حاجة بتضيع فيها وقتك اللي هو غالبا الفيس والفيديوهات واليوتيوب، وشوف بعدها النتيجة إيه بعد ما كنت بتحجج إن مفيش وقت واليوم بيعدي بسرعة مبقاش فيه بركة


اقرأ أيضا: إزاي تتخلص من إدمان السوشيال ميديا؟

5- افصل

تعرف تصفي ذهنك ؟

قاعد بتذاكر وفجأة اتقفلت، افصل

بتقرأ كتاب أو رواية وحاسس إنها مملة، افصل
اقفلها حالا وقوم اتحرك

باختصار إنت مش مُجبر على حاجة، مش مُجبر تكمّل مذاكرة ولا تخلص الرواية دي كلها دلوقت

متحطش نفسك تحت ضغط، طز في أي حاجة تعكنن عليك

خدلك بريك ..

6- clean your Room

أكيد إنت استغربت من النقطة دي، أيوة دي نقطة هتساعدك جدا وهتفتح نفسك على المذاكرة أو على الشغل عموما، خليك مُنظم ورتب كل حاجة حواليك، خلي أوضتك هي المحراب بتاعك اول ما تدخلها كده تنسى هموم الدنيا يا صاحبي ..

7- A,B,C,D

يعني حدد المهمام بتاعتك من حيث درجة الأهمية بالظبط زي الدرجات اللي المعيد بيكتبهالك على اللوحة مثلا، دي عندنا في هندسة مش عارف موجودة في باقي الكليات ولا لأ

(مهمة جدا، مهمة بس مش أوي، ملهاش لازمة وبتضيع وقت...)

وهكذا، يعني مثلا حاجة زي الفيس واليوتيوب، شوف إنت بقى هتحطها في أنهي درجة مقارنة بحاجة زي المذاكرة والشغل ..

8- اتحايل على عقلك

يعني مثلا انهارده يومك مليان مهام كتيرة جدا ويوم دسم ومحدد لنفسك حاجات كتيرة بحيث إنك اول ما تفتكر اللي وراك انهارده تتخض !

لأ تعالى بقى اضحك على عقلك وامسك كل مهمة قطعها حتت، يعني مثلا كنت مقرر إنك هتذاكر الشابتر الفلاني كله، ابدأ قول والله أنا دلوقت هذاكر 5 صفحات بس وهقف، أو النظري بس

هيبقى اسمك ذاكرت برضه، وافتكر إن "ما لا يدرك كله، لا يترك كله"

عقلك عامل زي الطفل، حايله هيسمع كلامك


اقرأ أيضا: طريقة فعالة لإنجاز أهدافك اليومية

9- حمرا يا قوطة

دي طريقة اسمها "طريقة الطماطم" عشان تقدر تركز في أي شيء بتعمله وعشان تنجز المهام اللي إنت مخطط لها

الطريقة هي عبارة عن 25 دقيقة تركيز وبعدها 5 دقايق راحة

بس فيه شرط مهم جدا، الـ 25 دقيقة بتوع التركيز لازم يكونوا 25 بجد، يعني إيه ؟

يعني سيادتك عايز تذاكر شابتر معين، تمام اظبط التايمر بتاعك على 25 دقيقة وابدأ ذاكر

خلال الفترة دي بقى اقطع إيدك قبل ما تتمد على الموبايل، اعمله وضع الطيران، لو حد نده عليك متقومش
عاررف لو البيت بيولع برضه متقومش، وأهو بالمرة تموت شهيد، عايز إيه أكتر من كدا ؟

لأ الفكرة فعلا إنك خلاص طالما قررت تركز يبقى لازم تكون صارم جدا خلال الفترة دي، أول ما التايمر يرن المهلة تخلص أقفل الكتاب فورا حتى لو لسه الشابتر مخلصش، حتى لو كنت بتحل مسألة وقربت تخلصها سيبها، عشان تلحق تستريح الـ 5 دقايق وبعدين ترجع تكمل تاني

الطريقة دي فرقت معايا جدا، وخليك عارف إنك مش هتقدر تلتزم بيها من أول مرة، لازم هتلاقيها رخمة كدا في الأول خصوصا إنك مش لوحدك في البيت وهتلاقيك دايما بتكسر القاعدة دي، بس مع الاستمرار هتلاقي نفسك فعلا تركيزك بقى عالي بتنجز مهام كتيرة من غير ما تحس

10- وأخيرا، كل النقط اللي فوق دي ملهاش أي تلاتين لازمة !!

اتضايقت ؟ .. آني آسف

تعالى أوضحلك، دلوقت إنت بعد ما هتقرأ البوست دا هتلاقي نفسك عايز تقوم تدغدغ الدنيا دلوقت وغالبا هلاقي حد كاتبلي كومنت "شكرا إنت شجعتني بجد وأديتني طاقة إيجابية، أنا هبدأ فعلا"

وفعلا هتلاقي نفسك بدأت، بس بدأت فين بقى ؟

في عقلك بس، وهنا بقى دي الكارثة اللي كلنا بنعاني منها

إنت عايز وبتقول هبدأ بس لحد دلوقت لسه معملتش أي حاجة تدل على إنك بدأت فعلا

نص ساعة بالظبط من قرايتك للبوست هتلاقي الحماس ده اتبخر، هتعمل save وسكرول داون وتتفرج على الهوم والفيديوهات وهوووب تلاقي اليوم خلص وشوية الحماس اللي كانوا عندك بح وتنسى تبدأ

طب الحل إيه ؟
الحل يكمن في "ورقة وقلم"

إنت قولت هبدأ وكان عندك نية فعلا إنك تبدأ، بس مخدتش خطوة فعلية تمسك بيها الحماس والطاقة الإيجابية دي قبل ما تتبخر

انقل الحماس اللي في عقلك ده على ورق، دي تجربتي اللي فعلا فرقت معايا، عملت إيه ؟

اشتريت نوتة ومسكت قلم وبدأت أحدد نقطة رقم 1 (ارجع بص عليها) وحددت أهدافي، وخليني أديكم مثال

يعني مثلا أنا كاتب عندي في النوتة أهداف شهر إبريل

• - المذاكرة أول بأول
• - ‏قراءة 4 روايات أو كتب
• - ‏مشاهدة 50 فيديو TEDx
• - ‏حفظ 500 كلمة إنجليزي

دا جزء من الأهداف الكتيرة اللي قررت أوصلها في شهر إبريل، طيب دول كتير أوي إزاي هتلحق تخلص كل ده، هرد عليك وأقولك إني طبقت أو هطبق النقطة رقم 2،4،7،8،9

الخلاصة إنك لازم تقوم دلوقت تستغل الطاقة اللي عندك وتبدأ خطوة فعلية وصدقني هيكون ليها تأثير عليك وهتطلع بفايدة

لكن طول ما إنت بتقول تمام هبدأ كمان شوية، هبدا من بكرة، طيب معنديش نوتة هبقى أشتري بكرة، اعرف إنك مش هتعمل حاجة

أتمنى يكون الرغي دا كله حد استفاد منه وقرر يبدأ فعلا وساعتها ابقى افتكرني بدعوة حلوة من قلبك ..