إزاي تتخلص من إدمان السوشيال ميديا؟

إزاي ممكن تقلل من السوشيال ميديا وتفضي مساحة من الوقت تنجز فيها أهدافك؟!

في المقال ده اتكلمنا عن 5 عادات لازم تتخلص منها وكان من ضمنها إدمان السوشيال ميديا

تقريبا أكبر مشكلة بتواجهنا حاليا هي كمية الوقت الضايع اللي بنقضيه ع الفيس بدون أي فايدة تذكر اللهم إلا شوية بوستات مفيدة بتظهر قدامك بالصدفة تعملها save وخلاص.

اقرأ أيضا: 10 خطوات للقضاء على الكسل والمماطلة.. روشتة مجانية

مبقتش قادر تبعد عن الموبايل ثانية واحدة، كل دقيقة تبص ع الشاشة وإنت عارف إن مفيش إشعارات ظهرت، كل شوية تفتح الفيس وتقلب في الهوم وتقفل وتفتح وهكذا. لو معملتش كده ممكن يجرالك حاجة!.. الموضوع بقى عبارة عن إدمان.




طبعا أكيد محدش فينا حابب الوضع ده وبنحاول نلاقي حلول تخلينا نبعد عن الموبايل والفيس شوية ونركز في الأهداف اللي مش عارفين ننجزها دي. تعالى أقولك ع حل بسيط للمشكلة دي.

فيه تحدي أو دراسة اتعملت ع مجموعة من الناس اللي بتستخدم السوشيال ميديا بإدمان. في البداية بتحمل أبلكيشن بيقيس الوقت اللي إنت بتقضيه ع النت وكل شخص يسجل النتايج.

شخص قال أنا استخدمت النت لمدة 200 دقيقة في اليوم يعني 3 ساعات، وحوالي 70 مرة أسيب الموبايل وأرجع أمسكه تاني. واكتشفت إن وقت كتير جدا ضاع في حاجة تافهة ملهاش أي تلاتين لازمة وكنت أقدر أستفيد من الوقت ده في حاجة تنفعني!

من هنا بدأ أول يوم في التحدي، طلبوا من الأشخاص دي إنهم يحطوا الموبايل في جيبهم أو يبعدوه عن إيديهم لمدة يوم لكن النت شغال عادي وكل الابلكيشنز موجودة. وشوف هل هتقدر تستحمل يكون الموبايل قدامك والإشعارات والرسايل عمالة تظهر ع الشاشة وإنت مش عايز تبص عليها ولا مش هتقدر تقاوم؟.. وبعد ما اليوم يخلص قولنا عشت اليوم ده إزاي.

واحدة قالت:

"كنت حاسة بملل فظيع، قاعدة مستنية القطر والموبايل في جيبي هموت وأطلعه وأفتح الفيس وأشوف إيه الجديد، بس استمريت في التحدي وبدأت أشغل نفسي قولت هقوم أتمشى شوية، طلعت السلالم ونزلت، لسه قدامي وقت.. فكرت إني ممكن أطلع وأنزل تاني وفعلا طلعت ونزلت 10 مرات وقدرت بكل بساطة أستغل الوقت اللي أنا مستنية فيه القطر وأعمل جزء من تمارين رياضية بسيطة ع عكس لو كان الموبايل في إيدي كنت هقضي الوقت في حاجة ملهاش لازمة ومش هتفيدني".




تحدي اليوم التاني كان أقوى وأصعب وهو إنك تحذف كل الابكيشنز من ع الموبايل(شايفك ياللي بتقول ما عدا الفيس طبعا) لأ كله يعني كله.. وتشوف هتقدر تقضي يوم أو يومين من غيرها ولا لأ.

لما سألوهم عن شعورهم، معظهم جاوب وقال أيوة الموضوع كان صعب لكن لما اكتشفت كمية الوقت الفاضي اللي ظهر في اليوم نتيجة ابتعادي عن الموبايل حسيت إني أنا السبب في الفشل اللي أنا فيه وإني مليش حق أتحجج بإن مفيش وقت أحقق أهدافي. الوقت طلع موجود أهو بس أنا اللي رافض أنجح ومش قادر أتحكم في نفسي وأسيطر عليها وأبعد عن النت اللي واخد كل وقتي.

باختصار التحدي ده إداهم فرصة يكتشفوا مقدار الوقت اللي بيضيع ع النت من غير فايدة وإزاي لما سبت الموبايل وسبت النت أصبح عندك وقت كافي ويفيض منه كمان إنك تعمل كل اللي إنت عايز تعمله بس بتحجج بالوقت.

إنت كمان تقدر تجرب التحدي مع نفسك، هتقدر تسيطر عليها وتبقى إنت اللي في إيدك زمام الأمور، وإنت اللي تحدد إمتى تقعد ع النت وإمتى تبعد. ولا هي اللي هتسيطر عليك وتتحكم فيك؟!

التحدي ده غالبا لو عملته لوحدك كالعادة مش هتلتزم بيه، من الأفضل يكون معاك في نفس التحدي ناس تانية بتشاركك عشان تحس إنك مش لوحدك وإن فيه ناس تانية أهي بتعمل زيك عشان قرروا إنهم يكسروا العادة دي ويبدلوها بحاجة تانية مُفيدة.

عشان كده قررنا ننفذ التحدي ده بشكل جماعي ع قناة التليجرام فلو حابب تجرب وتنضم لينا ده اللينك:
https://t.me/readythengo