"قاعدة العشر
دقايق لحل مشكلة التسويف"
التسويف مشكلة كبيرة جدا بتواجهنا كلنا بدرجات متفاوتة.. إحنا بنسوف ليه؟!
لإن المهمة اللي ورانا غالبا ما بتكون صعبة ومُملة وفي نفس الوقت هي أهم
مهمة في اليوم كله.
·
ليه أقعد أذاكر الشابتر الفلاني وأحفظ وأتعب
نفسي في حين إني ممكن أفتح الفيس اتفرج ع حاجات تضحكني؟!
·
ليه أروح الجيم وألعب تمارين وأبذل مجهود،
عليا من ده كله بإيه؟!
فكرة إنك مش شايف أي استفادة من الحاجات دي، أو الاستفادة بتكون ع المدى
البعيد، يعني نتيجة التمرين والجيم بتحتاج شهور عقبال ما تظهر. وده طبعا ضد طبيعتك
كإنسان "عَجول".. بيبص دايما ع الحاجة اللي تديله إشباع فوري، حاجة لحظية!
طيب نعالج المشكلة دي إزاي؟!
فيه قانون اسمه قانون الـ 10 دقايق، الفكرة كلها هي إنك هتظبط تايمر لمدة
10 دقايق فقط، هتبدأ تشتغل ع المهمة اللي إنت عمال تأجلها. فقط 10 دقايق وأول ما التايمر
ينتهي خلاص اعتبر نفسك خلصت!
هتقولي طب أنا كده استفدت إيه، 10 دقايق يعملوا إيه أصلا؟
خلينا متفقين إنك إنسان كسول وبتأجل كتير، بتأجل نتيجة إن الحاجة اللي
وراك عشان تعملها وتخلصها فأنت محتاج مثلا ساعتين.. فبتقول لنفسك ياااه ساعتين بحالهم
لأ خليها بعدين.
طيب لما آجي أقولك يا سيدي الحاجة دي اظبط تايمر 10 دقايق بس ابدأ فيها..
كل المطلوب فقط 10 دقايق.
ده هيخليك تفكر بجدية إنه 10 دقايق حاجة بسيطة يعني مش محتاجة تأجيل،
وإلا بقى لو إنت برضه عندك نية تأجل تاني يبقى ربنا يعينك ع نفسك بقى، مفيش حلول سحرية
إذا كنت إنت نفسك مش ناوي تتحرك!
حاجة كمان.. غالبا الحاجة اللي إنت عمال تأجلها بقالك
شهور، لما بتاخد قرار تبدأ فيها بتكتشف إنها مكنتش تستاهل كل التأجيل ده، بتكتشف إنه
سهلة جدا ومكنتش بالضخامة اللي إنت كنت متخيلها، فالفكرة هي إنك تاخد خطوة البداية.
اقرأ أيضا: 4 خطوات
عملية لتغيير حياتك نحو الأفضل
كمان مجرد ما التايمر ينتهي والمنبه يرن، مؤكد هتحس بشعور إيجابي إنك
انجزت حاجة حتى لو كانت بسيطة، فعقلك هيبدأ ينشط ويتحفز..
مع تكرار القاعدة دي لفترة معينة هتلاقي تحسن كبير في حل مشكلة التسويف،
جايز يكون تحسن بطيء نوعا ما لكن طبعا أفضل من لاشيء!
فالنصحية هي:
كل ما تلاقي مهمة إنت عمال تأجل فيها نظرا لإنها هتحتاج وقت ومجهود، فكل
اللي عليك اظبط تايمر 10 دقايق فقط وابدأ في المهمة خلال المدة دي وبعدين اقف..
اعمل حاجة غيرها، ارجع من جديد بعد ساعة مثلا كرر نفس العملية وهكذا.
استمرارك هيخليك كل مرة تزود الفترة دي لحد ما تتفاجيء في النهاية إن المهمة الصعبة
اللي بقالك شهور مأجلها.. خلصت أهي في وقت قصير وإنها مكنتش صعبة زي ما كان عقلك بيوهمك.
#استعد_ثم_انطلق
![برسنت](http://pinterest.com/pin/create/button/?url=https://reviewhangy1.blogspot.com/2019/11/rule.of.10.min.to.stop.being.lazy.html&media=https://blogger.googleusercontent.com/img/b/R29vZ2xl/AVvXsEiHI46fBRzOH4NY4QTzzN1C8LgIAYTMTngmh1BrfmbhMbGL99MhCi0dEx4hc_AgkD_961oC3HDnE6MR3VW_CgtaJaz2LYnEAposQleYa_Y6ssbp51Gw5k3uJXXQCnQWOTmYneWDqv3u2e-H/s72-c/1574704703895.png&description= "قاعدة العشر دقايق لحل مشكلة التسويف" التسويف مشكلة كبيرة جدا بتواجهنا كلنا بدرجات متفاوتة.. إحنا بنسوف ليه؟! لإن ا...){kind=link}
تعليقات: 0
إرسال تعليق