"4
أسرار لتعلم لغة جديدة"
مدة الفيديو: 10 دقايق.
الفيديو ده لازم يتبروز مش يتسمع.
1- السر الأساسي:
المُتحدثة بتقول إنها بتتعلم لغة جديدة كل سنتين، ولما كانوا بيسألوها
عن الطريقة أو الخطة كانت بتقولهم إنها فقط بتحب تتعلم لغات جديدة. مكنتش شايفة أي
سبب غير كده.
سألت نفسها إيه فعلا اللي يخليني عندي الطاقة والقدرة أتعلم كل اللغات
دي؟.. بدأت تقابل أشخاص زيها اتعلموا لغات كتير عشان تسألهم اتعلمتوها إزاي.
قابلت واحد اسمه "بيني" ده كان بيتعلم عن طريق التحدث مع السكان
الأصليين ع طول، يعني حتى قبل ما يحفظ كلمات ولا ياخد كورسات. مكنش بيتكسف من إنه يغلط
قدامهم.
التاني ده بقى حكاية ودماغ لوحده اسمه"لوكاس" من البرازيل،
الجدع ده عمل أغرب حاجة ممكن تتخيلها عشان يتعلم اللغة الروسية، عمل إيه؟!
ببساطة فتح سكايب وضاف حوالي 200 واحد روسي، وبدأ يتشات مع شخص منهم وقاله
"مرحبا" بالروسي. فرد عليه الروسي ده قاله "مرحبا، كيف حالك" قام
صاحبنا لوكاس واخد الجملة كوبي وفتح شات مع شخص تالت خالص وبعتهاله، فرد عليه قاله
"أنا بخير، شكرا لك. كيف حالك أنت" قام البيه واخد الجملة كوبي وبعتلها للشخص
الأولاني! شايفين الدماغ.
بتقول إنها قابلت ناس كتير جدا، منهم اللي بيسجل الكلمات بصوته، منهم
اللي بيحفظ أكتر الجمل الشائعة في اللغة اللي عايز يتعلمها. منهم اللي بيبدأ بتعلم
القواعد. لكن اكتشفت في النهاية إن السر الأساسي والعامل المشترك بينهم كلهم هو
"الإستمتاع".
هو ده سر تعلم أي لغة جديدة، إنك بتعمل ده بحب وباستمتاع مش عشان مُجبر
أو مُلزم تعمل ده، والدليل ع كده طب محنا كنا بناخد إنجلش في المدارس، استفدنا إيه؟
ولا أي حاجة. لإن الموضوع بالنسبالنا كان مُجرد دراسة عشان أعرف أنجح في الامتحان ومسقطش.
2- ابحث عن طرق فعالة:
الاستمتاع لوحده مش كفاية، لازم تدور ع طرق فعالة وتناسبك، لإن الطرق
كتيرة جدا. اختار اللي يناسبك وابدأ فيها. تقدر تجرب تطبيقات تعلم اللغة، أو حتى تتفرج
ع قنوات اليوتيوب هتلاقي طرق كتيرة اختار منها طريقة تناسبك.
3- تخصيص وقت وخطة لعملية تعلم اللغة:
كلنا مشغولين، وكلنا فينا اللي مكفينا وورانا شغل ومذاكرة... إلخ.
فعشان تيجي تضيف كمان حاجة جديدة في يومك زي إنك تتعلم لغة فلازم تحطلها
خطة واضحة ميبقاش الموضوع بيتم بشكل عشوائي. خصص وقت مُعين إنشالله يكون نص ساعة بس
كل يوم.
النص ساعة دي بقى اعمل فيها أي حاجة خاصة بتعلم اللغة مهما كانت بسيطة
أو قليلة، اتفرج ع فيديو مثلا. احفظ كلمات جديدة واكتبها. المهم إنك كل يوم يكون فيه
وقت لتعلم اللغة. ومتستعجلش إن قدامك كورس مثلا عايز تخلصه في يومين عسان تبدأ تشوف
النتيجة.. اتقل وخليك راسي.
4- الصبر.. الصبر!
المشكلة الأبدية عندنا كلنا، عايزين في يوم وليلة نتكلم إنجلش أحسن من
السكان الأصليين نفسهم، إزاي بقى ملناش فيه.
لازم لازم يكون عندك نفس طويل وتصبر طالما عايز تتعلم بجد، يومك مفهوش
غير 24 ساعة، مش هتقدر تخترع ولا تزود ساعات إضافية عشان تتعلم بسرعة. ع مهلك خالص
وخد وقتك. محدش بيجري وراك، عملية التعلم عملية مستمرة.
"من غير الممكن أن تتعلم لغة في شهرين، لكن يمكنك بكل تأكيد إحراز
تقدم ملحوظ خلال شهرين."
وافتكر دايما "قليل دائم خير من كثير مُنقطع".
#استعد_ثم_انطلق
مشاهدة ممتعة![برسنت](http://pinterest.com/pin/create/button/?url=https://reviewhangy1.blogspot.com/2019/10/4.secrets.to.learn.new.language.html&media=https://blogger.googleusercontent.com/img/b/R29vZ2xl/AVvXsEgFxmYE_sGKD0UM9wW-vrtrupQ0ebKQksa7WVsS81lRLuJDerNbiG9n54EJcGVo9lwmY4a75-B_0jqJTyu9CBeKzg_drd1G6BLySNYEZbT7XYo3LBzI20dkDdqCdfwvcaqyLBv8tymv6wcT/s72-c/1572360401968.png&description= "4 أسرار لتعلم لغة جديدة" مدة الفيديو: 10 دقايق. الفيديو ده لازم يتبروز مش يتسمع. 1- السر الأساسي: المُتحدثة بت...){kind=link}
تعليقات: 0
إرسال تعليق