"قبل
أن أموت أريد أن.."
مدة الفيديو: 8 دقايق.. اقرأ للآخر!
ساندي تشانج اللي بتُلقي المحاضرة قالت إنها فقدت شخصية عزيزة عليها جدا
كانت زي أمها، ده خلاها تفكر في الموت وإنه إذا كان كلنا هنموت فإيه الحاجات اللي عايزين
نعملها قبل ما نموت تخلينا نعيش الوقت اللي باقي من عمرنا في سعادة وراحة.
جاتلها فكرة الحقيقة فكرة عظيمة ومُلهمة جدا، الجدار أو الحيطة اللي في
الصورة جمب بيتها، صحت في يوم دهنته بالشكل ده وكتبت عليه جملة واحدة "قبل أن
أموت أريد أن..." املأ الفراغ. وعلقت طباشير ع الحيطة.
وقالت إنها مكنتش متوقعة أي شيء يحصل بس هي عملت كده وخلاص، اتفاجئت تاني
يوم إن الجدار اتملى ومبقاش فيه مكان واحد فاضي!
فيه ناس خدت الموضوع جد وكتبت عبارات مؤثرة زي:
"قبل أن أموت أريد أن أخبر أمي العزيزة كم أحبها"
"قبل أن أموت أريد أن أمسك يدها مرة أخرى"
ناس تانية كتبت عبارات كوميدية زي:
"قبل أن أموت أريد أن تتم محاكمتي بتهمة القرصنة"
ناس تالتة اعتبرت الموضوع سخيف وسخرت منها، كالعادة يعني الناس اللي لازم
تعترض ع كل حاجة.
الفكرة لاقت نجاح كبير جدا وبدأت الناس تنفذ الفكرة في منطقتها ويصوروا
الحيطان ويبعتوهالها.
بل كمان اتعمل موقع مخصوص معروض فيه كل الصور وكل الحيطان من مختلف دول
العالم، تقدر تتفرج عليها بنفسك.
ده لينك الموقع:
عملت كتاب برضه بنفس العنوان وجمعت فيه أفضل العبارات اللي اتكتبت.
اقرأ أيضا: طريقة
فعالة لإنجاز أهدافك اليومية
الفكرة عجبتني جدا، وبسأل هل ينفع نجربها عندنا؟.. لو حد مثلا ليه في
الجرافيتي أو الرسم ع الجدران يدعم الفكرة؟.. أو بشكل مبدئي، كل مجموعة في منطقتهم
يتجمعوا ويكتبوا الجملة دي بالعربي طبعا ع الحيطة ويسيبوا أقلام أو طباشير للناس تكتب.
طلاب الجامعات برضه ممكن الفكرة تتنفذ في إيفنت أو بأي وسيلة مُمكنة..
الفكرة تستاهل نجربها.
وكنوع من خطوة البداية يعني، أنا هسيب لكم في الكومنتات فورم أو ابلكيشن
مفهوش أي حاجة غير الجملة دي وتدخل تكتب ما يحلو لك. وبعدين هجمع كل العبارات في كُتيب
صغير. فاللي حابب يشارك معانا يشوف الكومنتات.
دي الفورم، هتدخل تكمّل الجملة بعبارة واحدة أو أكتر زي ما تحب.
هتلاقي الجملة مرة عربي ومرة إنجلش تختار تكتب بأي لغة تعجبك.
مشاهدة ممتعة..
.....
![برسنت](http://pinterest.com/pin/create/button/?url=https://reviewhangy1.blogspot.com/2019/11/beforeidieiwantto.html&media=https://blogger.googleusercontent.com/img/b/R29vZ2xl/AVvXsEiqXxe0EWWL8weoxGq_fXusgT98LsOfdiqqebU0DTIXTYuTIYcqI6vLmL972Og7Qf5uZAUX5aGJvWrlynkgot2K9gsY_cX3g5MaWfjESz279cevSQ2mUdRm9cim80E57q1BA4ad7fuC6zqV/s72-c/1574515641744.png&description= "قبل أن أموت أريد أن.." مدة الفيديو: 8 دقايق.. اقرأ للآخر! ساندي تشانج اللي بتُلقي المحاضرة قالت إنها فقدت شخصية عزيز...){kind=link}
تعليقات: 0
إرسال تعليق